An Old Family Picture
*******************************************************************
Dyes anyos na an nakakalabay. Tuig 1999. Trese anyos an ak panuigon. Duro an turo han uran. Makaharadlok nga kikilat ngan dalugdog. Alas dos pala han kulop pero baga na hin gab-i. Mahagkot hin duro. Baga ak hin sisip-onon ngan hihirantan. Ginkikit-an ko hi Tatay, singkwenta anyos na an panuigon, nga nagtutukdo hin usa ka burta nga inani nga humay. Tikang ha hagna, kinahanglan namon tambakon ha may harani han pinaka-highway nga dalan an am mga inani para matreser na. Harayo nam ginbibinaktas tikadto tikanhi. Hi Nanay nagtutukdo gihap hin burta hin humay. Halbo hin duro an hagna. Oppps! Nahipakulob hi JR, an puto ha magburugto, ikasiyam nga anak nira Tatay ngan Nanay. Mga sais anyos pala an iya panuigon hadto nga mga panahon. An iya tinukdo nga humay nagkahudlog ha kali. Diri hiya ginapaupod ha hagna pero mapirit gud nga bata. Baka hin ginkukunot an ak kasingkasing han mga hinkikit-an ko. Hi Marvin, an sumunod ha akon, in padayon la nga naglalakat para makaabot na hiya didto han tambakan han humay. Makakapahuway gihap hiya bisan pira la ka minuto. Karuyag ko tumuok. Maguol na. Pero damu pa an nakatambak nga mga uhay han humay ha hagna. Makaradlok pa an mga linta nga danay nadukot ha ak panit. Kay ano nga gin-anak kami nga pobre? Kunta nagin riko hira Tatay ngan Nanay. Bumagisbis ha ak mga mata an luha han kapobrehan. Ginkukurian hi Tatay pagtinukdo-tukdo. Diri na malinaw an iya mga mata. May katarata hiya. Hi Nanay bisan kon waray la reklamo, maaram ako nga gingugul-an na hiya. Nahipakulob ak hin pira ka beses. Puno hin lusak an lawas pati na an nawong. Nahangad ak ha langit ngan nagpapakiana ha Ginoo hin damu nga mga butang. Di ak maaram. Basta an ak nakadi ha huna, bubuhaton ko an ngatanan para diri na kami magtinukdo-tukdo hin mga humay ha halbo nga hagna.
=====================================
NEXT ARTICLE:
PROFILE: RICHARD "DICK" GORDON
